15-ka xubnood ee joogtada ka ah Golaha Ammaanka ee Qaramada Midoobey ayaa maanta kulan xasaasi ah ku yeelanaya Magaalada New York ee Dalka Mareykanka, kaasoo loogaga hadlayo arrimaha Soomaaliya.

Kulankan oo ah mid xasaasi ah ayaa waxaa markii u horeysay si wada jir ah uga qeyb galaya Wafuud ka kala socoto Dowladda Federaalka iyo Isbaheysiga Dib u Xoreynta, iyadoona ka hor inta uusan kulanka bilaaban laga hor aqrin doono qoraal uu soo saaray Xogyahaha Guud ee Qaramada Midoobey Mr Ban Ki-Moon.

Wakiilka Qaramada Midoobey ee Soomaaliya Ahmedou Ould Abdallah ayaa warbixin ka siin doona Golaha Ammaanka xaaladihii u dambeeyay ee Soomaaliya iyo arrimihii dib u heshiisiinta.

Waxay dhinacyada ka qeyb galaya shirkaas maanta isla eegi doonaan, suurta gelnimada Ciidamo ka socda Qaramada Midoobey oo la keeno Soomaaliya, iyo sidii Ciidamada Ethiopia u bixi lahaayeen, sidoo kale waxaa laga hadlayaa xaaladaha bani'aadanimada, gaar ahaan arrinta shaqaalaha gar gaarka oo noqday maalmahan kuwa la bartilmaameedsado.

Dhinacyada kulankaas uga qeyb galaya Shirka Golaha Ammaanka waxay jeedin doonaan qudbooyin kala duwan oo ay uga hadlayaan xaaladaha dalka iyo heshiiskii Jabuuti.

Kulankan maanta ay yeelanayaan Golaha Ammaanka ayaa ku soo beegmaya, xilli Labo garab u kala jabay Isbaheysiga Dib u Xoreynta, isla markaana garabka shirkaas ka qeyb galaya ay yihiin kuwa Jabuuti ee kal hore heshiiska la gaaray Dowladda Federaalka

.

Hamse, M Abdi

SOmalia

Wya2007@hotmail.com