Taliska Milateriga Dowladda Soomaaliya ayaa si rasmi ah shaaca uga qaaday in Ciidamada Milateriga ay kala wareegeen Ciidamada Ethiopianka Howl galadii Muqdisho.

Afhayeenka Ciidamada Milateriga G/lle Dahir Maxamed Xirsi ayaa daboolka ka qaaday in Ciidamada Dowladda la wareegeen Howl galadii ay Muqdisho ka wadeen Ciidamada Ethiopia

"Ciidamada Dowladda Federaalka ayaa la wareegay howlgallada Muqdisho ka socda, Ciidamada Ethiopia hurdo ayay ku jiraan" ayuu yiri Afhayeenka oo ugala jeeday in Ciidamada Ethiopia ay nasan doonaan.

Afhayeenka Ciidamada Mileteriga Dowladda Federaalka Soomaaliya waxaa uu sheegay in ay Ciidamada Dowladda wadaan howlgallo ay ammaanka ku sugayaan, wuxuuna sheegay in intii ay howlgallada wadeen aysan la kulmin wax iska hor-imaad ah.

Mar wax laga weydiiyay afhayeenka in ay goobaha dadka rayidka ah degan yihiin ay madaafiic ku garaacaan xiliyada la soo weeraro ayaa wuxuu sheegay in aysan taasi waxba ka jirin, wuxuuna caddeeyay in iyagoo madaafiic heysta ay lug ku tagaan Ciidamada meelaha weerarrada looga soo qaado kadibna ay ka howlgalaan.

Dowladda Federaalka ayaa horay u sheegtay in Ciidamada lagu soo tababaray Dalka Ethiopia ay sugi doonaan Ammaanka Magaalada Muqdisho, waxaana durba soo baxaya warar sheegaya in Ciidamada lagu soo tababaray Dalka Ethiopia ay degi doonaan xeryaha Ciidamada Ethiopianka ku leeyihiin Gudaha Magaalada Muqdisho
 sidoo kalena waxaa beryahan yaraday iska hor'imaadyadii Ba'naa ee ka dhici jirey gudaha caasimada Soomaalida.

Hamse M, Abdi

Horufadhi.com