Isbaheysiga Dib u xoreynta Soomaaliya garabka fadhigiisu yahay magaalada Asmara ee Dalka Eritrea ayaa saacadaha soo socda wuxuu ku dhawaaqayaa hoggaan cusub oo uu yeesho.

Xoghayaha Arrimaha Bulshada ee Isbaheysiga Dib u xoreynta Soomaaliya Suldaan Maxamed Garyare ayaa sheegay in saacadaha soo socda ay dooran doonaan Guddoomiyaha Isbaheysiga Dib u xoreynta, Guddoomiyaha Golaha Dhexe iyo Xoghayayaasha Isbaheysiga.

Suldaan Maxamed Garyare oo ka gaabsaday in uu faah-faahin dheeraad ah ka bixiyo doorashada ay sameynayaan ayaa wuxuu sheegay in ay maanta ku dhawaaqayaan mas’uuliyiintii ay ku bedeli lahaayeen madaxdii Isbaheysiga.

Xoghayaha Arrimaha Bulshada Isbaheysiga Dib u xoreynta Soomaaliya waxaa uu intaas ku daray in ay go’aankaas qaateen kadib markii ay fashilmeen wada hadallo ay Yemen ku yeesheen wakiillo ka kala socday garabyada Isbaheysiga ee kala jooga Magaalooyinka Asmara iyo Jabuuti, kuwaasi oo la doonayay in labada dhinac la isugu soo dhaweeyo.

Magaalada Asmara kooxda ku sugan waxaa aabe u ah Sheekh Xasan Dahir Aweys oo la rumeysan yahay inuu lahaa fikradii Maxkamadihii Islaamiga, halka Magaalada Jabuuti kooxda ku sugan ay hormuud u yahay Shariifkii Maxkamadaha iyo kii Baarlamaanka oo xilligan saaxibo dhow ah, laakiin waxaa muuqata in meesha ay ka baxday Saaxibtinimadii Xasan Dahir iyo Sheekh Shariif oo labaduba ahaan jiray Maxkamadihii Islaamiga waxaana dadka Siyaasada Soomaalia indha indheeyaa ay sheegayaan in Xasan Aweys yahay nin Qori maal ah oo aan Ogoleyn Tanaasul iyo xal Nabadeed oo ka dhaca Geyga Soomaalida. Halka Shariifkuna yahay Aftahan Siyaasi ah oo Leh Shacbiyad weyn, dadka Soomaalida ahina ay aad u jecel yihiin. wuxuuna markasta sheegaa in Soomaalia ay Midnimadeedu tahay Muqadas.

Si kastaba arrintu ha ahaatee, haddii saacadaha soo socda ay ku dhawaaqaan hoggaan cusub xubnaha Isbaheysiga ee jooga Magaalada Asmara waxay taasi micnaheedu tahay in Isbaheysiga Dib u xoreynta uu si rasmi ah u noqday labo garab oo iska soo horjeeda, isla markaana kala fadhiya Magaalooyinka Asmara iyo Jabuuti.

Hamse M Abdi

Somalia.

Wya2007@hotmail.com