Maxamed Cumar Xabeeb (M/Dheere) oo galabta Golaha Wasiirada Soomaaliya ay xil ka qaadis ay ku sameeyeen ayaa sheegay in wareegtada xil ka qaadistiisa ay tahay mid qabyo ah.

Isagoo degenaan muujinayay ayuu Maxamed Dheere sheegay inuu ku faraxsan yahay dimoqraadiyada dalka ka jirta, isla markaana ay tahay sharci ah in shaqsi xilka laga qaado iyo in xil loo magacaabo.

"Aniga wareegtada xilka leyga qaadin si caadi ah iima soo gaarin, laakiin Idaacadaha ayaa maqlay, laakiin wareegtada wali waa qabyo"ayuu yiri Maxamed Dheere.

Wuxuu sheegay in xil ka qaadistiisa ay ka harsan tahay saxiixa Madaxweynaha oo kaliya, hase ahaatee Xafiiska Ra'iisul Wasaaraha uu leeyahay soo jeedisan sida uu sheegay in isaga horay loogu magacaabay.

"Ra'iisul Wasaaraha soo jeedin ayuu leeyahay, xil ka qaadista waxaa leh Madaxweynaha, taasna waa dastuur dalka uu yaala, mana ahan mid aniga la igu roonaanayo iyo mid la igu darnaanayo, aqbalaada waxaa leh Madaxweynaha"ayuu mar kale ku celiyay Maxamed Dheere oo u muuqday mid ku kalsoon Madaxweynaha.

Maxamed Dheere wuxuu ku faanay in Muqdisho uu wax weyn ka qabtay, tan iyo markii xilka Gudoomiyaha loo magacaabay, taasna uu sheegay in ay tahay wax muuqda sida uu yiri.

Wuxuu kaloo sheegay Maxamed Dheere inuu la yaaban yahay in xilna laga qaado eedna loo soo jeediyo, taasoo ugala jeeday wareegtada Golaha Wasiirada ay u cuskadeen xil ka qaadistiisa, sida muuqatana Maxamed Dheere kuma qanacsana xil ka qaadistaas, wuxuuna ku doodayay in Madaxweynaha uu yahay mid xilka magacaabaya xilkana qaadaya hadii buu yiri uu soo jeediyo Ra'iisul Wasaaraha.

Si kastaba ha ahaatee arrintan ayaa la ogeyn halka ay ku dambeyn doonto, iyadoona sida muuqata Madaxweynaha uu yahay shaqsiga u horeeya ee ka soo horjeeda xil ka qaadistaas, waxaana laga yaabaa in Madaxweynaha iyo Ra'iisul Wasaaraha ay isku khilaafaan xil ka qaadista Maxamed Dheere.

Hamse, M Abdi

SOmalia

Wya2007@hotmail.com