Madaxweynaha Dowladda Federaalka KMG ah ee Soomaaliya Md. Cabdullaahi Yuusuf Axmed oo saakay kasoo degay garoonka diyaaraddaha Canoco ee duleedka magaalada Garoowe ayaa la hadlay Xildhibaanada Baarlamaanka Puntland iyo Golaha Wasiiradda, isagoo ku soo qaaday arrimo fara badan oo khuseeya Puntland iyo guud ahaan Soomaaliya.

Madaxweyne Cabdullaahi Yuusuf Axmed iyo wafdiga uu hoggaaminayo ayaa waxaa ka mid ah Wasiirka Macdanta iyo Batroolka Maxamed Maxamuud Gaanje iyo xubno kale, wuxuuna Madaxweynaha uu sheegay in socdaalkiisa ay ka danbeysay kadib markii Madaxda Puntland iyo dadka kale ay soo gaarsiiyeen hadalo iyo waxyaabo ka dhacay Puntland, taasoo uu sheegay in ay ogaanayaan xaqiiqda iyo xaalada ka jirta Puntland.

Md. Cabdullaahi Yuusuf oo khudbadii uu ka jeediyay hoolka Baarlamaanka ayaa waxaa uu sheegay in wax badan ay isbadaleen tan iyo mudadii uu ka maqnaa Puntland, wuxuuna sheegay in ay maqan yihiin gobolo uu xiligii maamulayey Puntland gacanta lagu hayey, wuxuuna tilmaamay in wixii hada ka danbeeya laga shaqeyn doono sidii dib loo soo celin lahaa, isagoo ku gubaabiyay Madaxda Puntland iyo shacabka in ay isu tagaan sidii loo sugi lahaa amaanka deegaanada Puntland.

"Dhegaheena wax badan baa ku soo dhacayey oo meeshaan waa ka dhacay, iney run yihiin iyo in kalena ma aqaan" ayuu yiri Madaxweyne Yuusuf oo hadalkiisa intaa ku sii daray, "Haatan aniga Cadde Muuse ma dooran oo Illaah baa ila og, Baarlamaankaa halkaa ka soo jeeda baa doortay, haatana isagaa nagu daba wato inaad tiraahdaan Cadde Muuse waa kaa isbaraxay, wuxuuna yiri doorashada waa waqtigeeda".

Md. Yuusuf ayaa waxaa kaloo uu u sheegay Golaha Baarlamaanka iyo Wasiirada in uu dhowr jeer uu hore uu kula taliyay in uusan xiliga doorashada wax ku kordhin, "Aniga waxaan kula taliyay Ilaah baa og, haduu idiin sheegey iyo hadii kaleba, Caddow sidii waagii wax noogu dhaceen yeysan u dhicinee waqtiga ka kordhin , maantase ma guddoonsanaa Caddow iney saas tahay, doorashadana waa waqtigeeda" ayuu yiri Madaxweynaha Dowladda KMG oo kula taliyay Madaxweynaha Puntland in meesha laga saaro inqilaab iyo jujuub bulsho, isla markaana shacabka loo madax baneeyo cidey doonanayaan.

Mar uu ka hadlayey dhinaca nabadgelyada ayuu sheegay Madaxweynaha in xukuumadda Cadde Muuse ay ku mashquushay raadinta dhaqaalaha halka xukuumadda Soomaaliyana ay ku mashquushay arrimaha amniga, wuxuuna u sheegay Cadde Muuse inaan la calfan doonin dhaqaalaha hadii aanan la helin amni iyo xasilooni.

"Hadii aadan fikirin oo aadan amni ka shaqeyn dhaqaalaha aad soo saartay calfan meysid, wasiirkii ku shaqada lahaana ee Federaalkana waa kaas, nin kaloo ina adeerkaa waaye, arintaasina waan ka hadli doonaa" ayuu yiri Madaxweynaha oo ka hadlayey dhibaatada amaan la'aanta, wuxuuna intaa raaciyay inaan Hal Liter la soo saareyn hadii aan amni jirin .

Mar uu ka hadlayey dhinaca rabshadaha ka dhacay degmooyinka PL ayuu sheegay in dadka ka danbeeya ee leynayo waxgaradka in ay ujeedada ay leeyihiin ay tahay burburinta Puntland, wuxuuna tilmaamay in ay jiraan rag sheeganaya in ay dhisayaan dowlad, kuwaasi oo uu tilmaamay in guryahooda la soo burburin doono.

Madaxweynaha Dowladda KMG ayaa sidoo kale ka hadlay arrimaha dib u heshiisiinta ee ka socda Soomaaliya isagoo sheegay in ay jiraan dadaalo iyo guulo la taaban karo, wuxuuna qiray in ay jiraan tiro yar oo ka soo horjeesatay dib u heshiisiinta Soomaaliya kuwaasoo uu ku tilmaamay iney yihiin kuwo leh dano gaar oo doonaya in aan la helin wax nidaam ah, wuxuuna sheegay in dhamaadka bishan in dalka Sacuudiga lagu soo saxiixi doono heshiiskii dhex maray Dowladda iyo Isbaheysiga garabka nabada qaatay, sidoo kalena ay jiraan guddiyo la magacaabay oo ka shaqeeeya hirgelinta xabad joojinta iyo cidii ku xadgudubta heshiiskaasi la gaaray.

Mar uu ka hadlay Madaxweynaha rabshadaha weli ka sii socda ayuu sheegay in aysan jirin dagaal fool ka fool balse ay jiraan dhalinyaro uu sheegay in loo soo dhiibo bambooyin oo la yiraahdo meelaha ku tuura kuwaasna ay ciidamada qaranka ka adag yihiin.

Ugu danbeyntii Md. Yuusuf ayaa si weyn ugu hadlay arinta muran ka dhex dhalisay Baarlamaanka Puntland iyo xukuumadda ee Dastuurka cusub, wuxuuna ka yiri "Waxaan waagii hore kari weynay, haatan oo amni jirin ma kartaan, tirakoob iyo doorasho taam ahna lama sameyn karo ,isbadal waa inuu ku yimaadaa rabitaanka shacabka, Dastuurkaad sameyseen iyo kan federaalka ee hada socda hadhow hadii ay is khilaafaan kiina badaleysaan, axdiga qarankana ma tilmaamayo in DG walba wixii ay rabto iney iska sameysato,hadii ay wax idinka qaldan yihiin saxa"

Madaxweynaha ayaa ujeedada socdaalkiisa ay qeyb ka tahay sidii arintaasi loo xalin lahaa sida uu cadeeyay maanta, isagoo xubnaha Dowladda Puntlanna u sheegay in qeyraadka ku jira dhulka Puntland xiligan aan la isku mashquulin ee loo so jeesto nabad ka shaqeynta markaasina kadib lagu dhaqaaqo wixii raadin qeyraad si Soomaalida oo dhan ay ugu macaashto.

Cadde Muuse Xersi ayaa isna halkaasi ugu warbixiyay Madaxweynaha Dowladda KMG isagoo sheegay in mudo afar sano ah aysan Puntland ka bixin dagaal iyo dhibaatooyin kale, isagoo sheegay in xukuumad ahaan ay xooga saarayeen dhaqaale raadin si shacabka baahida looga bixiyo, wuxuuna tilmaamay in nabadgelyada xiligan dar dar la geliyay oo degmooyinka qaar culeys la saaray sida magaalada Gaalkacyo oo uu sheegay in xiligan lagu guuleystay wax ka qabashada xaaladeeda.

Cadde Muuse ayaa sheegay in ay jiraan dad doonayo in ay burburiyaan Puntland, kuwaasi oo uu sheegay in maamulkiisa soo ogaaday, balse isha lagu haayo, wuxuu sheegay in hadii aan la dar goyn dadkaasi aan horumar la gaareyn, wuxuuna dadka shicibka ku amaanay dadaalkooda ku aadan far muuqista ay ciidamada ugu farmuuqaan kuwa dhibaatada wada.

Magaalada Gaalkacyo ayuu sheegay Madaxweynaha Puntland in aysan jirin kala qeybsanaan magaalada ah, isagoo tilmaamay in labada dhinac ee magaalada ay leeyihiin wada shaqeyn, isla markaana haatan ay u sameynayaan shaciyo iyo guddiyo, wuxuuna intaa raaciyay in ay ku shaqeeyaan hal siyaasad.

Wuxuu kaloo sheegay in kuwa dambiilayaasha ah ee dhibaatada waday la arki doono goor dhow lana soo afjaray arinta Gaalkacyo.

Mar uu ka hadlayey arimaha Gobolka Sanaag ayuu sheegay in lagu soo duulay, haatana ay jiraan dad oranaya Boosaaso ayaa inoo dhiman iyo Garowe taasna ma dhaceyso buu yiri, wuxuuna Cadde Muusu uu tilmaamay in ay shacabka deegaankaasi ay u dagaalameen sidii ay isaga saari lahaayeen kuwii ku soo duulay.

"Laascaano ayaa inoo harsan, inagaa naqaan sida aan ka yeeleyno, dadka shicibka degan kaliya ayaan u digayaa, waxaan leeyahay ka shaqeeya sidii Puntland sideeda ugu soo noqon laheyd" ayuu yiri Madaxweynaha Puntland oo ugu danbeyntii sheegay in lagu guuleystay wax ka qabashada magaalooyinka Boosaaso iyo Garoowe oo xaalada amaan ay iminka tahay mid wanaagsan.
 

Xigasho Allpuntland

Horufadhi.com