Waxay aheyd arrin dad badan ay sugayeen go'aan qaadashada Madaxweyne C/llaahi Yuusuf oo horay u diidanaa xil ka qaadista Maxamed Dheerer waxaana go'aanka Madaxweynaha ay aaqirkii noqotay mid dib usoo celisay candhuuftii uu laqay Maxamed Dheere ee uu ku weyn lahaa xilkiisii Gudoomiyaha Gobolka Banaadir ahna Duqa Magaalada Muqdisho.

Madaxweynaha Dowladda Federaalka Soomaaliya C/llaahi Yuusuf Axmed ayaa lagu soo waramayaa in warqad u ogolaaneysa in shaqadiisa uu sii wato gacanta u geliyay Gudoomiyaha Gobolka Banaadir ahna Duqa Magaalada Muqdisho Maxamed Dheere oo maalin ka hor ay xil ka qaadis ay ku sameeyeen Golaha Wasiirada Nuur Cadde.

Sida aanu ka heleyno Ilo wareedyo ku dhow dhow Maxamed Dheere ayaa sheegaya in Maxamed Dheere farta laga saaray waraaq u ogolaaneysa inuu howshiisa sii wato, taasoo xagal daacin ku ah Go'aanka Ra'iisul Wasaare Nuur Cadde iyo saaxibadiisa.

Wararka oo ah kuwa isa soo taraya ayaa sheegaya in Madaxweyne Yuusuf uu markii horeba uu ahaa mid aan ku qanacsaneyn Xil ka qaadistaas, isla markaana go'aankaas uu ahaa mid ku koobnaa kaliya Nuur Cadde iyo Kuxigeenkiisa Axmed Cabdisalaan.

Xarunta Maxamed Dheere ka degan yahay Magaalada Muqdisho waxaa haatan ka soconeysa farxad iyo damaashaad, iyadoona go'aanka Madaxweynaha uu dib shaqada ugu soo celiyay Maxamed Dheere ay tahay mid aysan la qabin Xubnaha Nuur Cadde horbooda, kuwaasi oo ka sugayay Madaxweynaha inuu aqbalo xil ka qaadista.

Maxamed Dheere laftiisa waxaa uu ahaa mid ku kalsooni qabay go'aanka kama dambeysta ah ee uu qaadanayo Madaxweynaha, taasoo uu horay u sheegay in Ra'iisul wasaaraha uu leeyahay soo jeedin, isla markaana Madaxweynaha uu yahay ruuxa ogolaanaya ama diidaya, taasna waxay keentay in Madaxweynaha go'aankiisa kama dambeysta ah uu qaato maanta, taasoo uu ku qaadacay soo jeedinta Ra'iisul Wasaaraha iyo Golihiisa Wasiirada ee ay xilka uga qaadeen Maxamed Dheere.

Arrintan hada soo cusboonaatay ayaa noqon karta mid Dowladda dhexdeeda ay ku sii kala qeybsamayaan, isla markaana ay dhici karto in Ra'iisul Wasaare Nuur Cadde iyo taageerayaashiisa ay ka qaataan Go'aan deg deg ah.

Wixii warar ee ka soo baxaya arrimahan kala soco wararkeena dambe

Horufadhi.com